Fulltrúar Mýralífs frá Landi og skógi, bresku fuglaverndunarsamtökunum RSPB og Landbúnaðarháskóla Íslands sóttu ráðstefnuna Power to the Peatlands 2026 sem haldin var 2.–4. september síðastliðinn í s'Hertogenbosh í Hollandi.

Þetta er í annað skiptið sem ráðstefnan er haldin en sú fyrsta var árið 2024 í Belgíu. Að þessu sinni voru um 750 sérfræðingar, vísindamenn, nemendur og fólk í áhrifastöðum samankomin til að ræða stöðu votlendis í Evrópu og stjórnun þess, miðla nýjustu þekkingu og vísindarannsóknum og læra hver af öðru með því að deila reynslu sinni og þeim lærdómi sem hlýst af því að starfa á þessu sviði.

Sérfræðingar frá Landi og skógi tóku virkan þátt í ráðstefnunni með erindum og kynningum á Mýralífi, á meðan fulltrúar RSPB og LBHÍ mynduðu ný og spennandi tengsl við aðila í svipuðum geirum.

Þátttaka hagsmunaaðila mikilvæg

Þrátt fyrir að erindin á ráðstefnunni hafi verið margbreytileg og kynningar með fjölbreyttu sniði og náð yfir ólíka þætti votlendis og þeirra áskorana sem við stöndum frammi fyrir, var rauði þráðurinn sem tengdi alla umræðu þátttaka hagsmunaaðila í endurheimtarverkefnum.

Þá var lögð áhersla á gildi endurheimtar votlendis fyrir evrópska bændur með svokallaðri „mýrarækt“ sem lýsir sér í sjálfbærri og stýrðri beit. Einnig var áhersla lögð á að virkja nærsamfélög í meira mæli í vöktunaráætlunum og deila betri þekkingu og færni innan evrópska votlendissamfélagsins.

Nýr samstarfsvettvangur

Hlutverk LIFE-áætlunarinnar var sérstaklega kynnt á ráðstefnunni þar sem mörg endurheimtarverkefni í Evrópu njóta góðs af LIFE-styrkjum til að bæta og endurheimta hnignuð búsvæði. Ráðstefnan var skipulögð af Natuurmonumenten (Hollandi), Natuurpunt (Belgíu) og Radboud-háskóla (Hollandi), í samvinnu við Eurosite, NABU, Greifswald Mire Centre, SER Europe, Wetlands International og International Mire Conservation Group, sem öll vinna að LIFE-verkefnum er varða endurheimt votlendis á Evrópusvæðinu.

Nýr samstarfsvettvangur leit dagsins ljós á ráðstefnunni, European Peatland Initiative – sem stjórnað er af Eurosite-samtökunum. Þessi nýi vettvangur er með það að markmiði að sameina ríkisstjórnir, ríkisstofnanir, rannsóknarmiðstöðvar, vísindamenn, sérfræðinga og fagfólk til að vernda, endurheimta og nýta votlendi á sjálfbæran hátt í þágu líffræðilegrar fjölbreytni, hreins vatns, loftslagsþols og kolefnishlutleysis.

Þetta var líka tækifæri fyrir íslensku sérfræðingana okkar til að heimsækja endurheimtarverkefni í Hollandi og Belgíu, þrátt fyrir að votlendi þar sé nokkuð frábrugðið því íslenska. Næsta ráðstefna verður haldin árið 2029 og við hlökkum til að mæta.